Ftesë për pjesëmarrje: Konkurs Ndërkombëtar për Projektimin e Qendrës Multifunksionale dhe të Stacioneve të Informimit të Parkut Kombëtar “Lumi Vjosa”

Ministria e Turizmit dhe Mjedisit dhe Agjencia Kombëtare e Zonave të Mbrojtura shpallin konkursin ndërkombëtar mbi hartimin e projektit Qendra Multifunksionale dhe Stacionet e Informimit të Parkut Kombëtar “Lumi Vjosa”.

Nëpërmjet kësaj thirrjeje ftohen të gjitha grupet e interesit t’i bashkohen nismës për forcimin dhe promovimin e vlerave natyrore e kulturore që mbart territori i Vjosës, lumi i fundit i egër i Evropës.

Konkursi Ndërkombëtar i Dizajnit synon të bashkojë studiot më inovative dhe kreative të dizajnit nga vende të ndryshme të globit. Ky konkurs u ofron këtyre studiove një platformë unike ku mund të shfaqin talentin e tyre, të krijojnë njohje dhe lidhje me kolegë dhe liderë ndërkombëtarë të kësaj industrie.

Ky projekt synon të kërkojë zgjidhje arkitektonike në harmoni të plotë me natyrën dhe peizazhin, propozime që do të shërbejnë si katalizatorë për rëndësinë kombëtare të kësaj zone. Konceptet duhet të bazohen mbi krijimin e parimeve që identifikojnë karakteristikat natyrore, trashëgiminë, vlerat kulturore, historike dhe arkeologjike të zonës si dhe në përvojat më të mira ndërkombëtare.

Për më shumë informacion si dhe për të aplikuar, vizitoni linkun:

https://akzm.gov.al/international-competition-for-the-design-of-the-multifunctional-center-and-information-stations-of-the-vjosa-river-national-park/